طقطوق : والله يا معلم يلي استحوا ماتوا..

بندوق : يا لطيف !!... مين خبرك انت؟؟!
طقطوق : شو مين خبرني ، معروفة يلي استحوا ماتوا..شو مبينة..
بندوق : ماتوا ماتوا ... خلص يعني
طقطوق : لك ايه ماتوا شو عمبمزح يعني
بندوق : الله يستر يا رب، أيه.. شو إيمتى ... اليوم ماتوا يعني
طقطوق : لأ من زمان، والله.. صارلهم منيح
بندوق : لا حول ولا قوة إلا بالله... كيف ماتوا؟
طقطوق : والله ماحدى بيعرف
بندوق : مرض خبيث يعني .. سرطان .. جلطة..
طقطوق : ما بظن
بندوق : أسباب غامضة يعني
طقطوق : إيه هيك شي..
بندوق : ودخلك ما طلع حدى منهم ؟
طقطوق : والله ما طلع المخبّر.... كلهن ماتوا ..
بندوق : لعمى.. يا لطيف ألطف .. شو هالدنيا !! ...... يعني هلأ يلي استحوا خلصوا ؟!! .. ما عاد في حدى !!
طقطوق : لأ فيه ، شلون خلصوا ؟!
بندوق : مو عمتقول كلهن ماتوا !
طقطوق : بس في شوي صغيرة ما كانوا معهم..
بندوق : والله منيح .. نفدوا يعني..
طقطوق : لأ مو كتير لأنه جاييهن الدور .. وبدهن يموتوا
بندوق : يعني يلي استحوا يا ماتوا يا بدهم يموتوا
طقطوق : تمام .. في ناس ماتوا ، وفي ناس عالطريق..

و مو بس هيك.. لأ.. لسّا كل واحد بدو يستحي بدو يموت ما في مجال..
بندوق : يا لطيف على هالزمن.. بتعرف لك طقطوق، والله من كم يوم على نكشة كنت رح استحي...
طقطوق : أوعى تعملها .. أنا ما لي حدا غيرك بها الدنيا .. والله بستحي وراك دغري...
بندوق : لك لأ. شو شايفني مجنون لاستحي.. والله دنيا مو مستاهلة ... عذاب بعذاب..
طقطوق : ايه والله .. اللقمة مغمسة بالدم..